🇸🇾🇸🇾نوااااح سوريا🇸🇾🇸🇾أوبريت
ومات الشوق على حِجرى
وتاه الصبح من فجرى
حلمت أعيش فى حريه
لقتنى فى السراب باجرى
***
🇸🇾🇸🇾🇸🇾
ياثوره كلها أوجاع
رمتنى من ضياع لضياع
ماحدش مد ليَّا دراع
ولا طبطب على خاطرى
***
🇸🇾🇸🇾🇸🇾
ياريت ماخرجت على أسدى
ولارمتلوش فى يوم جسدى
أناإللى سمحتله بهددى
أنا المغلوب على أمرى
***
🇸🇾🇸🇾🇸🇾
ياريت ماطالبت بحقوقى
ياريت مانظرت يوم فوقى
ياريت ماحلمت بشروقى
ولا ربيعى ولا زهرى
***
🇸🇾🇸🇾🇸🇾
قرأت الفتح والفاتحه
ورحت أنده على الفرحه
لقيت الدنيا مش سامحه
لقيت العصر مش عصرى
***
🇸🇾🇸🇾🇸🇾
قابلنى الغول بدبابته
وداناته وطيارته
فرعون إللى أنا إخترته
سقانى م العذاب مُرّى
***
🇸🇾🇸🇾🇸🇾
وجابلى م الطغاه روسى
يدَبّح فى الديار روسى
رخصت وهان عليه دوسى
طعنى بخنجره ف ضهرى
***
🇸🇾🇸🇾🇸🇾
مؤامره كلها تخريب
وخطه ماشيه بالترتيب
طهران وموسكو وتل أبيب
تلاته دمرو قصرى
***
🇸🇮🇮🇱🇮🇷
زمن معدوم فى إحساسه
موطى للخسيس راسه
وأهل الظلم رؤاسو
وفين العدل مش بادرى
***
🇸🇾🇸🇾🇸🇾
بكيت والدمع صفانى
شكيت والدنيا سمعانى
فى بطنى القتل مجانى
قتيل ومش شايف قبرى
***
🇸🇾🇸🇾🇸🇾
صلاح الدين فى حطينى
نايم والنار بتكوينى
ومين غيره يواسينى
ومين غيره يجيب نصرى
***
🇸🇾🇸🇾🇸🇾
وأمى عزمها مشلول
ونومها فى العسل بيطول
وسكته سكتة المقتول
ودفعالهم تمن جمرى
***
🇸🇾🇸🇾🇸🇾
ياشجره ضلها شوّاق
فتنى حسنها الفرّاق
ياريح للسفن غَرّاق
سيفك حامى على نحرى
***
🇸🇾🇸🇾🇸🇾
باعدى البحر من طوله
وبره صعب فى وصوله
لا بيطولنى ولا باطوله
وضايع فوق موجه عمرى
***
🇸🇾🇸🇾🇸🇾
لا حريه ولا تغيير
كلام فى الإملا والتعبير
فى واقعنا داحلم عسير
ووهم مات عليه صبرى
***
🇸🇾🇸🇾🇸🇾
ماعدش فيه أمل باقى
خلاص قطعت أوراقى
هاعيش عطشان واناالساقى
واموت مظلوم وده قدرى
***
🇸🇾🇸🇾🇸🇾🇸🇾🇸🇾🇸🇾🇸🇾🇸🇾🇸🇾🇸🇾🇸🇾🇸🇾
أوبريت من كلمات
شاعر الإحساس
(رضا عبد الحميد)
ليست هناك تعليقات:
إرسال تعليق