🍎 ضيعتنا طريز 🍇

        الشاعر بسام الاسبر.يكتب

      (ضيعتنا طريز ) شعر محكي 

قالوا على جبالك شلح ْ توب القمرْ 

لمّا نزلْ يرتاحْ 

عرقانْ كان وتعبْ من كتر السفرْ 

لبسْ الغيوم وشاح 

حسّ بعري قدّامكْ وجسمو سترْ 

وعالعينتين الراحْ 

ولمّا انزكمْ أنفو بنسمات العطرْ 

ورّدْ الخدّ ولاحْ 

تمنّى عاروس جبالك يقضّي العمرْ 

وللربّ قال سماحْ 

لكنْ إجا مرسوم من ربّو أمرْ 

قلّو استحي وسباحْ 

ولمّا اشتهى عناقيد حليانة وشقرْ 

خطرتْ عبالو الراحْ 

ومن يومها سكران من رشفة خمرْ 

يمكن عرقْ تفّاحْ 

وصفّا القمر من بعدها غاوي سهر 

ومدمن سكر وقداحْ 

كل ما على تلّاتك الحلوة عبرْ 

بيخفق إلك الجناح 

ياطريز ضيعتنا يامرجاتْ الخضرْ 

ويا فتنة الأرواحْ 

ملفى الطيور ومهبط غيوث ومطرْ 

وموطن جنا وأفراحْ 

إسمك قديم مغلغل بعمر الدهرْ 

مسك وقداسة فاح 

ماكان لسّا صار بالدنيا حبر 

ولاانكتبتْ الألواح 

كنتي لحن مزمار من هاك العصر 

عم يعزفو فلّاح 

ياما بكي عانغمتو وبكّى الصخرْ 

وياما حمامك ناح 

وياما سواقي دمّعو وعملو نهرْ 

ومنهم الأبرش ساحْ 

قالوا ملاك المعرفة وربّ الفكرْ 

لعندكْ إجا سوّاح 

صمّمْ صخورك مصطبة وتربك تبرْ 

صنّعْ أمانة وراحْ 

ونحنا ولادو بالمعرفة والصبرْ 

مع إرثنا منرتاحْ 

مادام في بعقولنا بعد النظرْ 

ومادام في بقلوبنا محبّة 

لاجنّتك مفتاح 

شعر:  بسام الأسبر