(جنــــايـــن ع الطـــــريــــق)
شوقى إليك .. باين .. جناين ع الطريق
ما انت الحبيب .. وانت القريب .. وانت الصديق
وانت اللى كملت الحكايه بالغرام
يا اللى انت فى قلبى سلام .. مالهوش حدود
يا ورود بتكبر كل يوم ع البوابات
يا أحلى أحلى الذكريات .. يا نسيم رقيق
صبح الطريق .. أحلى طريق ..
علشان بقلبه ضمنا
صبح الطريق بحنانه .. يشبه أمنا
ينده علينا .. لو فارقنا بعضنا
يعطف علينا .. لو فقدنا أرضنا
و يجيبلنا .. قمر التلاقى والسهر
إن كان علىّ يا غالى ..
مش محتاج إلا عنيك ياقمر
يكفينى قربك ..
يا اللى ضىّ عنيك بدايه للسفر
يا أنة القلب اللى ضايع فى الرحيل
بيفوت علينا ألف ليل
ويجينا ليل ..
بمراكب الحزن الإلهى .. يدوس علينا كلنا
نتعب ولكن قدرة الله العظيم ..
تحمى القلوب من ذلنا
مع إننا
ما زلنا جوه السكه ..
حالة ضعف تايهه فى السهول
وبرغم ده .. قادرين نقول ..
كل اللى جوه الروح ونتحدى الجبل
رغم الوجع .. عندى أمل
نرجع لدنيا الأمنيات المفرحه
نكسر بيبان الأضرحه
ونحقق المكتوب علينا من زمن
يا حبيبى يا أشرف وطن
محتاجه ليك
تحمى حياتى وذكرياتى م المحن
أوصل معاك جنة عدن ..
قبل الميعاد المنتظر
أفقد حياتى كلها
ولا لحظه أفقد فى النظر
#بقلمي
#دكتورعمر المختار
ليست هناك تعليقات:
إرسال تعليق